العنـــزة العنزية

من طرف **ناصر** السبت فبراير 12, 2011 7:45 am

المشرف

احم احم ..... منورين يا كتاكيت يا حلوين
الحكايه اسمها

..₪.. الحكـايــة الثـ ـانيــة : العنـزة العنـزيّـ ـة ..₪.

كان يا مكان يا مستمعين الكلام. وما يطيب الهرج ( الحديث ) والكلام إلا بذكر الله. لا إله إلا الله... في هالعنزة ( النعجه ) إلها أربع أولاد واحد اسمه .. سعسع وواحد اسمه .. حمحم وواحد اسمه معمع .. وواحد اسمه حماحم .. كل يوم بتطلع العنزة الصبح وبترجع الظهر حامله على ظهرها يندك ( كومه ) حشيش وصدرها مليانه حليب. أولاداتها ( اولادها ) جوا الدار. بتدق ع الباب. - يا أوليداتي ماع ( صوت النعجه عند النداء ).. يا اسخيلاتي ( صغير النعجه بنسميه سخل ) ماع.. افتحوا بويباتي .. ع ظهري بندك حشيش... وصدري مليان حليب. بهيظوا ( بهجمو ) الأولاد، وبفتحوا الباب. بوكلوا هالحشيش ويشربو الحليبات وبقيلوا ( نومه خفيفه بعد الاكل ) بجنب امهم..... والله يوم من ذات الأيام طلعت العنزة في رزقة أولادها .. هي بتطلع من هون والغول بيجي من هون. أثاري ( اي انه على علم )الغول يبقى سامع وعارف إنه في غنزه وأولادها... أجا الغول. صار يدبدب ( يدق على الباب ) ع الباب ويقول بصوت هرج ( صوت يشبه صوت النعجه الام ). - يا أوليداتي ماع .. افتحوا ابويباتي . ع ظهري بندك حشيش... وصدري مليان حليب. هاظوا السخول يفتحوا.. نط الزغير ( الصغير ).. قالهم ولكم هذا الغول. الغول. مش الغول... ما ردوش على سعسع وراح يفتحوا الباب .. زرك ( هرب ) واتخبى بالقش.. والله فتحوا الباب من هون والغول فات ( دخل ) من هون. صاروا يتفارخوا ( اي يصرخ واحد تلو الاخر ). نط ( هجم )عليهم الغول وسرطهم ( بلعهم ) في بطنه.

اسمعو يا حبايبي رايح اشوف هالحجه كاعده على عتبة الدار ابصر مالها بتنده علي .. خليكم معي ها مش تروحو لسى للحكايه بقيه .
.............. ارجعتكم حقكم علي اتاخرت عليكم هاظ يا حبايبي كانت الحجه بدها مني اجبلها اكمول راسها بوجعها .. ادعو ربنا يشفيها .. هيني وصيت اسيره تقرألها قرآن على راسها .. وانا حكمل الحكايه واروح اكعد جنبها حاكم لما الواحد يكبر بالسن ببطل يحب الوحده وشكلها اشتاكت لاولادها

ما الكم بطول السيره نكمل الحكايه

ما أقرب فرج الله أجت العنزه.. لقيت الدار قفره ( خاليه ) . خرفها ( حدثها ) سعسع القصه من البدايه للسلام عليكم.. طلعت.. راحت على ظهر بيت الغول وقعدت تدبك ( تضرب بارجلها على الارض )... صار الغول يقول:

مين اللي ع حيطاننا كسر فخارنا

ردت عليه العنزة:

- هاي العنزة العنزية، أم قرون احديدية، اللي أكل معمع وحمحم وحماحم يطلع ع البر يزاحم ( بسرعه ). قالها الغول استنيتي تمني ( حتى ) أعمل قرون من عجين وانزل لك. استنته. عمل قرون من عجين وقعد بالشمس. ونزل لها. قالت يا هلا بقرون العجين وكسرتهن بظربة ( بضربه ) واحدة. قالها استنيني تمني أعمل قرون من طين... عمل قرون من طين وقعد بالشمس تانشفت ( حتى جفت ) ونزل لها.. برظه كسرتهن بظربه واحدة. قالها استنيني تمني أعمل قرون حديد.. فاظت ( اي ثارت عصبيتها ) مع العنزة. قالت له وبعدين معاك وراحت ظاربه ( ضاربه ) بطنه بقرونها وفجرته ( قتلتو ) .. نطوا ( خرجو ) أولادها معمع وحمحم وحماحم.. أخذتهم وخلت الغول متلس(ميت ومرمي على الارض ).

وطار الطير الله يمسي الحاظرين بالخير.

هي حكايتنا لليوم انتهت يا رب تعجبكم وحنكمل السلسه لا تنسونا خليكم متابعينا

[/size]